Ajit Pawar Plane Crash: Baramati Accident Mein 5 Dead, Aircraft Jal Kar Raakh
Maharashtra ke Deputy Chief Minister Ajit Pawar ka plane Wednesday subah Baramati mein landing ki koshish ke dauran crash ho gaya.
Ajit Pawar ka plane crash, Maharashtra ke Baramati mein landing ke waqt bada haadsa, 5 logon ki maut
Maharashtra ke Baramati ke paas NCP leader aur Deputy CM Ajit Pawar ka private aircraft crash ho gaya, jisse poore ilaake mein afra-tafri mach gayi. Bataya ja raha hai ki yeh haadsa landing ke time hua. Plane ek khet mein gir gaya aur turant aag lag gayi. Jaise hi haadse ki khabar mili, local log, administration aur rescue teams spot par pahunch gaye.
Shuruaati jaankari ke mutabik, yeh accident tab hua jab Ajit Pawar ka chartered aircraft Baramati Airport par landing ki koshish kar raha tha. Ajit Pawar Mumbai se Baramati ja rahe the, jahan unhe district council elections se jude programmes mein hissa lena tha. Reports ke according, is haadse mein Ajit Pawar samet 5 logon ki maut ho gayi hai.
Spot se saamne aayi tasveeron aur videos mein dekha ja sakta hai ki plane ek khet mein gira hua hai aur usmein bhayankar aag lagi hui hai. Charon taraf se tez dhuaan uthta dikh raha hai. Plane poori tarah jal chuka hai aur uske tukde door-door tak bikhre hue nazar aa rahe hain. Local logon ka kehna hai ki yeh haadsa Baramati Airport se lagbhag 3–4 kilometre pehle hua.
Abhi tak yeh clear nahi ho paaya hai ki plane mein total kitne passengers maujood the. Yeh crash landing ki wajah se hua ya kisi technical fault ke kaaran, is par bhi filhaal koi official confirmation nahi hai.
Jaankari ke mutabik, Ajit Pawar ne ek din pehle Mumbai mein cabinet meeting attend ki thi. Uske baad woh Pune district mein 5 February ko hone wale district council elections ke silsile mein Baramati ja rahe the.
NCP leader Majid Memon ne bhi confirm kiya hai ki Ajit Pawar ko Baramati pahunchna tha. Aaj Tak ki team mauke par maujood hai aur unke mutabik, haadse ke baad badi sankhya mein local log crash site par jama ho gaye hain. Relief aur rescue operations full speed par chal rahe hain.
Local administration aur police bhi mauke par pahunch chuki hai. Ambulance aur medical teams ko turant bhej diya gaya hai, aur ghayalon ko nazdeeki hospitals le jaane ki taiyari ki ja rahi hai.
About the Author
